Tadi pagi saya hantar bini and the ging seberang pi Menumbok. Nasib ada dadi/mami yg free buli tulung ambil durang di menumbok. Kepayahan tu bini bawa 2 org budak naik bas, bukan sinang mau jaga durang dua staring kici ni, especially si wayne gontua huhuhu...
Ni tahun sepertia biasa macam tahun-tahun sebelumnya, inda dapat celebrate kaamatan di kampung (aiso lah aramaiti) terpaksa aramaiti sendiri2 lah huhuhu.. Tapi saya sudah apply cuti untuk kawin durang si salina n eddey minggu depan (04/06/2011). Sya cuti dari 2-6hb balik penampang bawa kereta lah. Bah kawan-kawan/saudara-saudara yg kanal durang si salina & eddey, jemput-jemput lah datang pi kahwin durang sana Penampang. Bah check ni skedul kawin durang k [kilik]. Kalau BOS inda mau kasi cuti time durang kawin, saya mau mogok berhenti keraja hahahaaaa.. inda bah, main-main saja, mana berani mau berhenti oo... banyak sdh tangungan bah..
Bah kamurang tinguk lah skedul kapal kami di bawah ni, amacam juga mau cuti kan.. berjurut tu kapal datang.. buduh punya kapal!!
Hari 5 tu kami ada pi Public Bank, sebab kami mau try test loan 2nd rumah baru di Taman Mutiara. Harap-haraplah saya punya loan kena approve, bukan banyak juga bah sya pinjam, sikit saja pun huhuhu... Kalau mau tunggu 1st house kami yang masih lagi berjeruk dia punya kunci rumah sana LPPB/SPNB, sampai bila-bila pun belum settle tu. Lama sudah kami tunggu tu rumah, mau hampir 3 tahun lebih. Adalah tu internal problem between LPPB n SPNB. Malas sya mau cakap panjang, sbb terlampau panjang cerita dia. Rugi tu 3 tahun kami menyewa, bagus lagi kami beli rumah.. alang2 bah urang bilang!!
O ya sebelum sya lupa, sya pun x mau ketinggalan bah, biar lambat congrat asal selamat hahaha.. sya mau congrat sya punya best friend dulu time kici-kici si Scotty McCreery sebab menang American Idol 2011. Mimang sejak time kami kici-kici lagi sya tinguk dia mimang berbakat sebab suara dia unik bah. Ada iras-iras jugalah suara kami. First time sya concentrate tinguk American Idol, sebelum ni inda pernah pun sya tinguk ni American Idol, buring punya program, urang tua bilang hahaha...
Kotobian tadau tagazo do Kaamatan to all my KDM frenz.. kalau kasi translate in Malay "happy harvest festival" atau in English "selamat menyambut pesta menuai"... Aramaiteee.....
Selamat Hari Gawai to all Sarawakian frenz... gayu guru gerai nyamai.. or translate in English "semoga panjang umur dan sihat sejahtera" ataupun kalau translate in Malay "long life, health and prosperity".
SELAMAT BERCUTI / HAPPY HOLIDAY
DONT GET DRUNK AND DRIVE, REMEMBER U PUNYA FAMILY, ANAKBINI, GIRLFREN, BOIPREN or ANAK KUCING DI RUMAH HAHAHA...
~FRED~
Sad Kaamatan Again!!
Posted by FNK Photography
-
-
